حديث ومغزل مع سناء الزعيم - شهيوات المملحات

 اليوم في حديث ومغزل مع سناء الزعيم قدمو لينا المستمعات مجموعة من الأفكار لتحضير مملحات شهية وساهلة و هذه البعض منها : 

* مريم من البيضاء :

 بيتزا بالخضر //

 زلافة من الدقيق و نصف كاس زيت العود ،  الابزار و الملح و الخميرة ديال الخبز ، و تكون العجين خفيفة و تخليها تخمر في الثلاجة ثم تطلقيها ، وتكون رقيقة وتطيب نصف طيبة 

الحشوة : كل الخضر الموجود في البيت تشحريها مع شوية الزبدة و الملح و الابزار ، وتفرشيها ثم تضيفي عليها علبة الطون زيت و الزيتون مقطع و شوية الفرماج من الفوق و تدخليها للفرن 

سهام من اسفي :

كوميرات معمرين بالكفتة //

400 غرام من الدقيق ، ياغورت طبيعي ، 2 معالق من سنيدة و معلقة من الزبدة و 3 المعالق من الزيت و معلقة كبيرة من خميرة الدار و الملح ، و تجمعيها بالماء ثم تكوريها و تخليها ترتاح 

الحشوة : تشحري بصلة مع صدر الدجاج أو الكفتة ، و 1 ضرس الثومة ،  ضامة البنة ديال الدجاج ،  الكامون و الابزار و التحميرة و الملح و الزعتر و الهريسة و معلقة من مطيشة الحك ، ثم تاخذي 2 كرعات محكوكين و 2 خيزويات محكوكين و مخلل الخيار و الزيتون مقطع ، ثم تسحري العجين و تبداي تلوي على شكل كوميرة و تدهنيها بالبيض و تشرطيها 3 شراطي بسكين من على الوجه و ترشي على الوجه الزنجلان أو الشانوج 

وممكن تستعملي حشوة أرى مع نفس العجين بالبيض مسلوق و محكوك ، الكاشير محكوك و الفرماج مقطع و تلوي بنفس الشكل 

* لمياء من مراكش :

 شنيك مالح //

 نصف كيلو من الدقيق و، كاس من الحليب ، معلقة من خميرة الخبز ، خمارة حمراء ، الملح و الزبدة و الطحين و تعجنيها و تخليها ترتاح في الثلاجة ثم تطلقيها و تطويها على 4 و ترجعيها للثلاجة و تعيدي العملية 3 المرات 

تبسطي العجين و تدهنيها بالجبن و الزيتون الأسود و الفرماج محكوك ثم تلويها على شكل حريبلات و تبداي تلويهاه على شكل حلزوني ثم تدهني الوجه بأصفر البيض و يطيبو بالصحة و الراحة